I gang med å rydde branntomta

— Det skal bli eit flott bygg som bygda kan vere stolte av, seier kontraktseigar Elin Tryti i GL Prosjektservice.

GL Prosjektservice er totalentreprenør på bygget og signerte nyleg kontrakt på prosjektet som blei einstemmig vedtatt i Vindafjord kommunestyre.

Les meir om det planlagte bygget her:

Fem veker med rydding

Ho framhevar særleg viktigheita av at ungane skal få eit basseng igjen. Denne dagen var sperringane som har haldt folk unna brannrestane frå 2019 fjerna. Totalentreprenøren har vegen vidare klar.

— Ryddejobben med å få vekk brannrestane skal ta cirka fem veker. Så satsar me på gå rett over på grunnarbeidet. Me skal vere ferdige med alt arbeid og levere bygget innan slutten av april 2025, fortel Tryti.

Den kjekkaste delen synest Tryti er å bli ferdig med riving og komme i gang med grunnen slik at folk ser at det er eit nytt bygg på veg opp. Ho har opplevd det lokale engasjementet som stort.

— Alle er interesserte i å få mest og best mogleg bygg for midlane me har. Til det har me med oss gode entreprenørar, rådgivarar og arkitektar, seier Tryti.

Ho listar opp Enwa som skal stå for stålbasseng, Ryfylke Elektro som tar det elektriske, Vats Anlegg som skal gjere grunnarbeid, Haugesund Ventilasjon som har ansvar for ventilasjon, Haugesund Automasjon som står for automasjon, Karmøy Rørteknikk som har rørleggeransvar, Sweco som står for prosjektering, HLM Arkitektur som bidrar med arkitektar, og Vest Stål og Fasade som har ansvar for stål i prosjektet.

Stas for lokalt firma

Ein av underentreprenørane GL Prosjektservice samarbeider med er Vats Anlegg AS. Prosjektleiar Sigbjørn Gjellestad i det lokale selskapet er glad for å vere med å bygge Vats si nye storstove.

— Det er ekstra stas å vere med som eit Vats-firma. Bygget betyr mykje for vatsbuen, så vel som kommunen, seier Gjellestad.

Bedrifta skal ha i snitt fem arbeidarar i sving på prosjektet til ein kvar tid. Gjellestad meiner kontrakten passar godt for dei.

— Me skal ha riving av betongkonstruksjonar, grunnarbeidet og utvendig vatn og avløpsanlegg, fortel prosjektleiaren.

Han rettleia ordførar Ole Johan Vierdal i gravemaskina når ordføraren tok det offisielle første spadetaket. Prosjektleiaren synest det var kjekt å hjelpe til på dem høgtidelege byggestarten.

— Som bonde har Vierdal litt kjennskap til graving, seier Gjellestad.

Også for kommunedirektør Yngve Folven Bergesen og prosjektleiar Frode Eike i kommunen var det ein stor dag. Etter ein lang prosess omtala dei det første spadetaket som ein milepåle som dei har sett fram til lenge.