Kommunedirektøren går inn for sklie

Dette kjem fram i møteinnkallinga det ekstraordinære formannskapsmøte neste tysdag. Etter at saka har blitt behandla i formannskapet skal den opp i kommunestyret seinare på dagen.

Vil dra besøkande

Dei fire millionane kommunedirektør Yngve Folven Bergesen vil gi i ei ekstra løyving til sklie er ekskludert moms, og under føresetnad av at det kjem inn tre millionar i ekstern finansiering. Dette samsvarar med summen Hatteland har øyremerka i gåve til dette.

— Eg tenker at det er viktig å få på plass dette til opninga av bassenget. Nå har Hatteland sagt at dei vil trø til med tre millionar, så då bør kommunen finansiere resten, seier styreleiar Janne Urdal Aursland i Vindafjordhallen SA.

I forslaget skriv kommunedirektøren at det er lagt til rette for installasjon av sklie som opsjon. Vidare opplyser han at plaskebasseng er tidlegare munnleg orientert utgått av omsyn til arealet ein då måtte sette av, og kostnadane knytt til det.

— Opsjonskostnaden er under utarbeiding, då arbeid med å skaffe fram revidert tilbodspris for hovudprosjektet har vore prioritert. I samband med reduksjonar har romhøgda blitt redusert og med det også mogleg lengde for sklia. Det er derfor ei noko kortare sklie som blir tilbode nå enn tidlegare, skriv Folven Bergesen.

Han opplyser at sklia er venta å kunne auke anlegget sine besøkstal og billettinntekter, og med det bidra i årleg redusert nettokostnad for anlegget.

— Då det også̊ er gjeve lovnad om ekstern finansiering knytt til sklia blir det tilrådd at ein aukar den kommunale finansieringa for å etablere sklia nå, og med det vere klar ved opning av anlegget, skriv kommunedirektøren.

Stig Hatteland, som er vatsbu og konsernsjef i Hatteland er glad for nyheita.

— Det er kjekt å høyre at dei satsar på å få mest mogleg igjen for midlane og bygger noko som vil trekke folk frå heile indre Haugaland og slik sett Vindafjord på kartet, seier Stig Hatteland.

Ønsket om sklie har blitt fremja sterkt av fleire i formannskapet under behandlinga av saka. Ei av dei som har vore mest tydelege er Anne Cecilie Berentsen (Sp).

— Eg har heile vegen sagt at me må bygge for framtida med sklie og meir, seier Berentsen.

I framlegget skriv kommunedirektøren at bygget også skal bli lagt til rette for framtidig installasjon av solcelleanlegg, med venta årleg produksjon 150- til 180.000 kWh.

140 millionar

Forslaget til Folven Bergesen markerer slutten på samspelsfasen. I denne fasen har kommunen og totalentreprenøren GL Prosjektservice vore i dialog om korleis ein kan avgrense kostnaden på symjehall og bygdahuset mest mogleg, utan at det går utover kvaliteten på bygget. Blant tiltaka som er gjort er å skape fleire felles funksjonar mellom symjehallen og bygdahuset.

I saksframlegget skriv Folven Bergesen at ein gjennom omarbeiding og prosjektutvikling har ein nådd vesentlege kostnadsreduksjonar og samstundes behalde konsept, hovudfunksjonar og kvalitetar. Vidare skriv han at prosjektet har nådd ei samla kostnadsreduksjon som svarar over det bestillinga i tidlegare politisk vedtak la til grunn.

Nå tilrår kommunedirektøren at bruttokostnaden for utvikla prosjekt vert godkjent, og at det nå går over i byggefase. Han foreslår at symjehall og bygdehus i Vats blir vedteke bygd med ei øvre bruttokostnad på 200 millionar inkludert moms. Folven Bergesen foreslår også at ein gjennom vidare arbeid med finansiering skal søke å avgrense kommunen si eigenfinansiering for hovudprosjektet til 48 millionar. I tillegg kjem den ekstra løyvinga på opp til fire millionar for sklie.

Det reviderte tilbodet frå totalentreprenør GL Prosjektservice AS er på 140.842.500 ekskludert moms. Folven Bergesen skriv at det samla er nådd ei kostnadsreduksjon på 21.085.940 ekskludert moms frå̊ tilbodet som blei levert 8. mai.

Administrasjonen får ros frå styreleiar Janne Urdal Aursland for innsatsen med å finne kutt i samarbeid med entreprenøren. Ho meiner mykje av kutta gjorde at ein berre fjernar unødvendig areal.

— Eg synest det endelege forslaget ser flott ut, seier Urdal Aursland.

Fleire gåver

Kommunen skal stå for drifta av symjehallen, mens Vindafjordhallen SA skal drifte bygdahuset. Styreleiar Janne Urdal Aursland fortel at Knapphus Energi sponsar inntil ein million til lyd og lys i storsalen på bygdahuset.

For å halde kommunen sine kostnadar nede i 48 millionar vedtok eit samrøystes formannskap 6. juni at Vindafjordhallen SA måtte skaffe 20 millionar i form av gåver og dugnad for å unngå at det blei kutta i fleire funksjonar. Sidan det er funne større kutt i samspelsfasen enn dei 15 millionane formannskapet vedtok har dette kravet blitt mindre. I tillegg skriv kommunedirektøren at kommunen vil søke om tilskot til lokale kulturbygg frå Rogaland fylkeskommune som kan gi inntil 3,8 millionar.

— Eg registrerer at kravet nå er redusert til 13,3 millionar, seier Urdal Aursland i Vindafjordhallen SA etter å ha lest saksdokumenta.

Vindafjordhallen SA har fått fire millionar i gåve frå Sparebanken Vest. Følgeleg står det att 9,3 millionar.

— Eg har håp om ein god dialog med kommunen framover. Kommunen kjem truleg til å bli ein leigetakar i bygdahuset, så me kan få til noko der. Framover kjem me til å jobbe mot diverse fond og støtteordningar for å få inn pengar, fortel styreleiaren.

Det har ikkje vore eit spesifikt tidskrav for når Vindafjordhallen SA må betale inn pengane. I saksframlegget skriv Folven Bergesen at om ein ikkje kjem i mål med tilstrekkeleg ekstern finansiering kan det vere ein moglegheit å inngå̊ ei nedbetalingsavtale over lang tid med Vindafjordhallen SA som svarar til den manglande finansieringa. Han ber om å få mandat av politikarane til å utarbeida naudsynte avtalar med Vindafjordhallen SA.