Utemiddag i minusgrader
Om gradestokken viser fleire kalde blå minusgrader er det berre å kle seg etter vêret, for den månadlege grillinga i båthamna er vel verd å få med seg.
Det er ikkje så enkelt å stå i flokk rundt utegrillen når vindretninga ikkje heilt klarar å bestemma seg for kva veg den skal blåsa røyken. Det ser likevel ikkje ut til at litt sviande auge, og litt host og kremt, legg ein dempar på verken matlysta eller stemninga denne kalde desemberkvelden.
For trettande gong på like mange månadar var det ein fin gjeng som samla seg til fellesgrilling i båthamna andre måndag i månaden. Ein tradisjon som har begynt å få godt rotfeste i bygda.
— Å møtast på denne måten var ein idé som kom fram då bygdelaget hadde idemyldring rundt kva me kunne gjera for å skapa enda betre samhald i Vikebygd, og Solveig Hortmann presenterte ideen med å møtast til felles grilling ein gong i månaden. Og det har me gjort etterpå, seier Ivar Ødegård, som er dagens bål-ansvarlege.»
