Elevane trivs i verkstaden

— Det har vore veldig kjekt så langt, seier Bjørg Ljusnes Sævareid.

Saman med Tuva Austestad, Emilia Aaserød og Sofie Toadalen utgjer ho dei fire jentene i ein VG1-klasse på 15 elevar. Dei synest det er eit godt miljø og legg ikkje så mykje merke til gute-fleirtalet.

Mange moglegheiter

Aaserød, Toadalen, Auestad, Aaserød og Ljusnes Sævareid trekkjer fram det varierte arbeid som noko som gjer kvardagen fin. Dei er mykje i den nye verkstaden og føler at dei får brukt teorien dei lærer i klasserommet på tvers av gangen praktisk. I tillegg til å kose seg på skulen ser dei lyst på framtidsutsiktene.

— Etter TIF er det mange kjekke yrke å velje. Sjølv tenker eg på kjemi nå, men har maritime yrke i bakhovudet, seier Aaserød.

Auestad og Toadalen har lyst til å jobbe i Nordsjøen, mens Ljusnes Sævareid vil jobbe på anlegg som eksempelvis maskinførar.

Gjer seg klar til å ta over garden

Denne dagen er det fleire i sving på dreie- og skrubenker. Elevane hadde fått i oppgåve å lage ei skrustikke. Ein av dei som jobba med oppgåva var Eirik Åsheim som dreia ein aksling ned til 12 millimeter. Han trivst på linja og synest klassen og lærarane er kjekke.

— Eg valte TIF fordi eg har lyst til å bli industrimekanikar, fortel Åsheim.

På sveiserommet held Halvard Haslemo, Jone Frantsen og Bjørn-Marcus Kristiansen på med å sveise ei skuffe. Frantsen verkar å ha framtida klar. Han ser for seg å bli lærling som landbruksmekanikkar etter at tida hans på Ølen vgs er over.

— Eg kjem frå ein gardsfamilie og valde dette fordi det vil vere nyttig om eg tek over garden ein gong, seier Frantsen.

Elevane får skryt av lærar Bjarte Tøsse. Han omtalar dei som lærevillige og ser på at det er lite fråvær som eit teikn på at elevane likar seg på skulen.

Lang venteliste

Avdelingsleiar Olav Hogne Espe for yrkesfag merkar at TIF har blitt populært. Han fortel at 48 ungdommar søkte på dei 30 plassane til inneverande skuleår. Som følgje av dette var inntakskravet eit karaktersnitt på 4,4. I 2017, året før Etne vidaregåande skule blei lagt ned, var søkjartalet 28.

Espe meiner at det er vanskeleg å seie kva som er grunnen til auken i søkjartala, men trekker fram moglegheitene til å jobbe offshore og trendar på ungdomsskulane som moglege årsaker. Avdelingsleiaren trur studieretninga har fått eit betre rykte dei siste åra og viser til at auken er ein trend i heile Rogaland. Han håpar at verkstaden som offisielt blei opna i 2020 er med og bidrar til oppturen lokalt.

Faglærarane på yrkesfaga har kontakt med bedrifter i samband med utplassering på VG2. Espe omtalar samarbeidet med lokalt næringsliv som veldig bra, samt Opplæringskontoret, som har ansvar for elevane når dei blir lærlingar. Kva gjeld TIF trekker han fram Westcon, SMV og Aibel som eksempel på bedrifter som tek imot elevar. Han ser positivt på framtidsutsiktene til linja.

— Det er ikkje sikkert me får same venteliste som i år, men eg er ganske overtydd om at me alltid vil ha ein viss oversøking, seier Espe.

Ny linje frå hausten

TIF-elevane i verkstaden skal snart ta eit nytt val i vegen vidare, når dei skal over i dei meir spesialiserte VG2-linjene med utplassering. Desse elevane blir dei første som kan velje VG2 Anleggsteknikk, som er eit kryssfag der elevar frå både TIF og Bygg og anleggsteknikk kan søkje seg inn.

— Me er veldig fornøgd med å få VG2 Anleggsteknikk på plass. Det kjem etter initiativ frå bransjen sjølv, fortel Espe.

I samarbeid med Maskinentreprenørens forbund (MEF) har Ølen vgs etter eit års intens jobbing inn mot fylkeskommunen fått oppretta linja. Avdelingsleiaren fortel at det var avgjerande for fylket at bransjen var så tydelege på at dei treng det. Fram til nå har det berre vore ein vidaregåande skule som har hatt linja, noko som har ført til store manglar på lærlingar. I tillegg til Ølen vgs får Haugaland vgs linja frå hausten.

All praktisk undervisning i programfag skjer ute i bedriftene. Følgeleg blir det to-tre dagar i veka i bedrift for elevane. VG2 Anleggsteknikk kvalifiserer til ni forskjellige lærefag. Espe seier at dei fleste aktuelle tenker nok på anleggsmaskinførarfaget. Han har skrive intensjonsavtalar om utplassering.

— Det er 15 bedrifter som kan ta imot elevar per nå, seier avdelingsleiaren.