Kenneth Karlsen (Frp) i Etne formannskap, tysdag.
Foto: Grethe Hopland Ravn
— Støttar med glede finansiering av bompengar
Då Kenneth Karlsen (Frp) uttala desse orda i Etne formannskap tysdag, og i tillegg sa at det truleg var første gong han hadde sagt noko slikt, braut latteren laus. Han har likevel ikkje snudd i bompengesaka – berre denne eine gongen.
Saka gjeld nemleg finansiering av bompengar opp Rusvegen, når Norske Redningshuder Hordaland Distrikt skal ha treningssamling i Etne første veka i mai. Bortsett frå pandemiåra har Norske Redningshunder, som er ein landsomfattande frivillig organisasjon, hatt treningssamling i Etne i over 20 år og i løpet av eitt år deltek dei på over 500 leiteaksjonar på landsbasis. Førarhundane treng mykje trening og det er svært verdifullt for både tobeinte- og firbeinte å delta på slike treningssamlingar, og Etne kommune har dei siste åra sponsa deltakarane med bompengeavgifta på 5.000 kroner som dei må betala for å køyra opp Rusvegen dei fem dagane samlinga varer. Det er rundt 50 personar som tar del i treningssamlinga, og på den måten legg
dei også igjen ein slant til næringslivet i Etne. Både ved å nytta seg av campingplassen, og handelsstanden.
— Etne Frp støttar med glede finansieringa til bompengane, sa Karlsen til formannskapet, som samrøysta bestemte at denne søknaden skulle dei støtta.
