Laks som nettopp er kommen gjennom laksefella i Etne.
Foto: Espen Bierud / Havforskingsinstituttet
Svakt år for laksen i Etneelva
I Etneelva har forskarar registrert færre laks enn tidlegare år. Det blei registrert 1095 villaksar, og det er det lågaste talet på lenge.
– 2023 er eit av dei svakaste åra me har sett for villaksen sidan registreringane våre starta i 2013, fortel leiar Øystein Skaala ved Havforskingsinstituttets fjord- og elvelaboratorium i Etne i ei nyheitsmelding.
I fjor registrerte forskarane 1095 villaks. I tillegg kom 1543 sjøaure, 23 pukkellaks og 23 rømde oppdrettslaks. Totalt blei det registrert at 2684 fiskar sumde opp i elva.
Om villaks gyter saman med rømd oppdrettslaks, kan dette påverka det genetiske materialet til villaksen.
– I så måte er Etneelva heilt unik, sidan me her også fjernar rømlingane samtidig som me registrerer dei, seier Skaala.
Men i fjor var det berre villaks som gytte i Etneelva.
