Tatt på senga av flytting

HIM er eit interkommunalt selskap som blei etablert i 2007 av eigarkommunane Bokn, Etne, Haugesund, Tysvær og Vindafjord.

Selskapet sitt hovudkontor og postadresse ligg på Toraneset Miljøpark, slik det er vedtektsfesta at det skal gjere. Fram til desember sat også administrasjonen i selskapet der. Då flytta dei inn i det nye driftsbygget på Årabrot Miljøpark.

Vil vere effektive

Administrerande direktør Gro Staveland i HIM opplyser at det er cirka 15 tilsette som har flytta. Ho fortel at nokre tilsette frå administrasjonen kan vere på Toraneset eit par dagar i veka, men at administrasjonen nå har base i Haugesund, saman med dotterselskapet HIM Transport AS og dei som jobbar på drift der.

— Flyttinga av administrasjonen blei gjort for å samle flest mogleg på Årabrot. Det er her me får flest førespurnader frå kundar. Me vil gi eit best mogleg tilbod til kundane og jobbe så effektivt som me kan, seier Staveland.

Avgjerda om å flytte administrasjonen ser ho på som forankra i vedtaket om bygging på Årabrot, som blei endeleg gjort av representantskapet der eigarkommunane er representerte.

— Det blei bygd sårt trengte garderobar og undervisningsrom i første etasje, og andre etasje blei satt av til kontor, fortel Staveland.

Ho seier at styret og representantskapet har blitt informert undervegs. Sjølv om administrasjonen nå har flytta, understrekar Staveland at det framleis kjem til å vere aktivitet på Toraneset i fleire generasjonar og viser til deponiet som nyleg blei opna.

Tok for gitt at administrasjonen blei

Flyttinga av administrasjonen blir ikkje varmt motteke i Vindafjord-politikken. Øyvind Valen (Ap) har stilt eit grunngitt spørsmål til formannskapsmøtet 6. februar der han ber om svar på om flyttinga er heimla i representantskapsmøtet.

— Me har ikkje fått det førelagt oss slik eg har forstått, seier ordførar Ole Johan Vierdal (Sp).

Han og varaordførar Gustav Løge Fosse (KrF) representerer Vindafjord i representantskapet.

Informasjonen om flyttinga kom overraskande på ordføraren. Vierdal er ikkje einig i Staveland i at det var underforstått at administrasjonen skulle flytte då dei vedtok bygget på Årabrot.

— Det var snakk om at det skulle byggast eit administrasjonsbygg for administrasjonen der ute. Eg tok det for gitt at dei som var på Toraneset skulle bli verande, seier Vierdal.

Varaordføraren fortel at han hadde same inntrykk som Vierdal. Som følge av at dei ikkje oppfatta at det var planar om å flytte administrasjonen stilte ikkje Vierdal eller Løge Fosse spørsmål ved dette i representantskapet. Ordføraren understrekar at det er lenge sidan byggeplanane var oppe, men at han ville reagert om flyttinga blei lansert.

Løge Fosse vil ikkje seie at han vil pålegge administrasjonen faste dagar i Skjold, men at det vil vere naturleg å stille spørsmål om korleis ein kan ivareta behova på Toraneset i representantskapet.

All køyring frå Haugesund

Dei tilsette i administrasjonen er dei same som før, men Vierdal fryktar at på sikt er fare for at det blir få frå indre bygder som søker når nye stillingar lysast ut.

— Eg er blitt tatt litt på senga, dessverre. Det trur eg ikkje gjeld berre meg, seier ordføraren.

I tillegg til administrasjonen, trekker Vierdal fram utkøyringa av renovasjonsbilar som for nokre år sidan blei samla i Haugesund. Etter at RenoNorden, som køyrde frå Toraneset, gjekk konkurs i 2017, overtok HIM IKS sitt underselskap HIM Transport ansvaret for å køyre renovasjonsbilar. Ei stund køyrde dei frå både Toraneset og Årabrot, men for nokre år sidan gjekk dei over til å køyre frå berre Haugesund. Vierdal fortel at det blei orientert om at transporten måtte leggast om og at det var mest formålstenleg å starte på Årabrot, men han tok det for gitt at dette berre gjeldt køyringa i Haugesund og omland.

Grannar opplyser: Øyvind Valen er styreleiar i Grannar. Grannar er politisk uavhengig. Redaksjonen står fritt og redaktøren åleine svarar for alle redaksjonelle vurderingar.