Aurelia Perednis toppa sigerspallen i NM. Her sølvvinnar Kim Eikefet (Odin SK, f.v.) og bronsevinnar Linda Carina Isaksen (Tromsø Atletklubb) på pallen.
Foto: Privat
Sport
Løfta seg til NM-gull
Sandeid-busette Aurelia Perednis (49) blei noregsmeister i veteran-NM i styrkeløft i Bergen i helga. Ho gler seg over at fleire år med hard trening gir resultat.
— Løfta eg får godkjent viser kva effekt eg har hatt av treninga, så vel som kva som må jobbast meir med, seier Aurelia Perednis, som konkurrerer for Karmøy Styrkeløftklubb.
Løft av 140 kilo i knebøyg, 72,5 kilo i benkpress og 165 kilo sikra ho NM-gullet framfor Kim Eikefet (Odin SK) og Linda Carina Isaksen (Tromsø Atletklubb). Markløftet og knebøyg-løftet var i nye personlege rekordar, åtte veker etter at ho sat rekord i dei same øvingane under EM i Malaga, der ho blei nummer sju. Ho konkurrerer i årsklassa 50-59, sidan ho fyller 50 i løpet av året.
Perednis flytta til Sandeid i 2023, og har tidlegare budd i Vikedal.
