No skal gutar bli menn i Ølen

Endeleg er det tid for nabo-oppgjer mellom rivalane Etne og Ølen igjen, etter nokre år utan. Ølen vann til slutt si 6. divisjonspulje overlegent med 10 poeng ned til Sveio på andre plass. Ei ny organisering av junior og A-lagsfotballen er blitt gjort, for å møte dei høge krava denne sesongen.

Stor gruppe

Denne ettervinteren og våren har junior og seniorspelarar trena i lag. Dette er ei stor gruppe som tel heile 45 spelarar når alle er på plass. Desse spelarane skal fordele seg på tre lag utover sesongen: Senior 5. divisjon og 7. divisjon, samt eit juniorlag i G19 i 2. divisjon. Det er 26 spelarar som enno held junioralder, medan 19 av spelarane har senioralder. Ein av trenarane i teamet rundt laga, Ole Arne Pedersen, fortel at det blir konkurranse om plassane denne sesongen.