Kongebesøket
Fekk klar ny båthamn til kongebesøket
Kongeparet kjem inn til Ølen med Kongeskipet Norge torsdag. Ølen Båtlag ønskjer at mange reiser ut i båt og helse kong Harald og dronning Sonja velkommen. Dei håpar kongeparet likar synet av deira nye dugnadsbygde båthamn.
— Me har oppmoda medlemmene til å ta båtane på sjøen og møte kongen, fortel hamnesjef Magnar Nøkland i Ølen Båtlag.
Faktumet at besøket skjer i arbeidstida gjer at ikkje alle som vil får høve til å vere der. Sjølv er Nøkland opptatt med jobb i Stavanger. Båtlaget vil likevel vere godt representerte torsdag. Magnar Heggebø, Svein Brekke, Kjartan Grøndal, Bjørn Inge Heggebø, Sverre Andersen og Lars Toadalen gler seg til å ta imot kongeparet. Dei satsar på å komme seg ut i båtane sine for å møte kongeskipet.
— Eg trur det er ein god del som tenker å gjere det, seier Toadalen.
