Sport
Ølen med sterk bortesiger i cupen
Ølen IL er klart for kvartfinalen i Rogalandscupen i fotball for menn etter ein sterk bortesiger i Stavanger.
Ølen IL reiste seg meisterleg etter tapet mot Etne i 5. divisjon sist torsdag, då dei tok turen til sørfylket for å spele åttandedelsfinale i Rogalandscupen sundag.
— Dette var ein opptur me trengte, seier trenar Nils Are Golf.
Annonse
Straffe-miss
4. divisjonslaget Stavanger IF var motstandar. Grunna divisjonsforskjellen starta kampen med eit straffespark til Ølen. Den blei ikkje omsett i skåring. Men Ølen kom likevel raskt opp i ei 2-0-leiing i kampen, og hadde ifølgje Golf full kontroll på motstandaren.
— Me møtte eit lag som stod godt mot oss, i motsetnad til laga me har møtt i seriespelet som er meir opptatt av å bryte opp spelet vårt og ta ned tempoet i kampane, seier han.
Då heimelagets Filip T. Wroblewicz pådrog seg raudt kort like før pause fekk Ølen ein noko lettare oppgåve, noko dei og tok vare på. Og Ølen kom opp i ei fin 4-1 leiing før heimelaget byrja å svare opp for alvor.
Annonse
— Dei vart i grunnen farlegare med 10 mann i siste del av første omgang, enn då dei fekk justert seg etter pause, fortel Golf.
Ei stund så det ut som om historia kunne gjenta seg for eit Ølen-lag som har hatt ein tendens til å gå opp i liminga. Det blei eit hektisk og målrikt siste kvarter, men Ølen klarte å redde i land ein 4-5-siger og dermed billett til kvartfinalen.
Raud feiltolking
Idar Golf pådrog seg sitt andre gule kort då han trudde at dommaren, som ifølgje trenar Nils Are Golf signaliserte at det skulle leggjast til fem minuttar – men la til ni, blåste av kampen.
Golf sparka til ballen i sigerus, men det viste seg at kampen likevel ikkje var over, det var noko anna dommaren hadde blåst for.
Dermed fekk Idar Golf sitt andre gule kort, blei utvist og må stå over kvartfinalen.
Annonse
Nils Are Golf seier at dei hadde rekna med å kunne nå langt i kretscupen då dei valte å melde seg på der, i tillegg til at dei stiller både G19-lag og 2-erlag i 7. divisjon i tillegg til 5. divisjonsspel.
— Me ønskja å matche oss mot gode 4. divisjonslag, og det får me der, slår han fast.
Motstandar i kvartfinalen blir klar etter trekning onsdag.
PS! Ølen speler seriekamp heime mot Nord 2 onsdag kveld.
