— Det gler meg aller mest når ungane mine og dei nærmaste har det godt

— Kva er din favoritthobby?

— Sage stokkar og putle på med grindverk. Når eg treng fisk set eg garn.

— Kor reiser du helst på ferie?

— Eg likar meg best heime. Eg har ikkje utferdstrong. Eg nyttar ledige stunder til å sjå om sauene i Bjellandsfjellet i Åkrafjorden. Men skulle det vera noko så tar eg gjerne ein tur til København med kameraten min Ole Magnus.

— Kva er det beste med bygda du bur i?

— Eg har det meste av livet budd i Sandeid, som er heimstaden min. Nå bur eg på Sørstranda. Eg set pris på ete middag på Fønix eller på campinga. Etne har det aller meste.

— Kva saknar du i bygda di?

— Eg saknar ingenting.

— Kva er ditt favorittmåltid?

— Sos og poteter må ein ha. Sosakjøt med ein halv boks sæterømme og poteter frå Mo.

— Kva gler og kva irriterer deg mest?

— Det gler meg aller mest når ungane mine og dei nærmaste har det godt.

Det plagar meg å sjå utviklinga i Europa. Uroa og polariseringa i den politiske dagsorden. Eg tenker ofte på utsegnet: Om 100 år er allting gløymt». Det forundrar meg at verdiane generasjonane før oss kjempa hardt for – nå er sett i spel.

— Dersom du hadde politisk makt, kva ville du ha kjempa for?

— Eg ville laga autotrekk eller Vipps-ordning til dei fattige i dette landet. Dei får merksemd kvar julehelg. Etterpå blir dei meir eller mindre gløymde.

— Kva gjer du når du skal unna deg noko ekstra?

— Litt aquavit i eit eggeglas på naustet.

— Kva er ditt beste barndomsminne?

— Det er så mangt. Eg hugsa godt eg la hovudet i den store arbeidshanda til far min, då me kvilte middag. Den lukta ei blanding av spillolje og silo. Det var trygt og godt for ein gutunge.

— Kven ser du mest opp til?

— Heilt alminnelege arbeidsfolk og folk som gjer så godt dei kan ut frå sine forutsetningar.