Nils Halleland (f.v.), Annelise Grindheim og Bjarte Dagestad gler seg til at folk kan lytte til høyrespelet om kong Magnus Erlingsson og faren Erling Skakke.
FOTO: SVEIN-ERIK LARSEN
Kulturarv i ny form
Etter fleire års planlegging er Sogespelet Kongen frå Etne tilgjengeleg som høyrespel og fått eigen nettstad. Nils Halleland, Annelise Grindheim og Bjarte Dagestad satsar på at det nye formatet kan vere med å halde Etne sin viktige bit av Noregs-historia i live.
— Eg håpar lyttarane får ei stemningsfull oppleving, seier Annelise Grindheim, som har omarbeida Johannes Heggland sitt originale manus for høyrespel, hatt regi og er forteljar.
Sogespelet Kongen frå Etne er eit historisk drama som skildrar den turbulente maktkampen på 1100-talet mellom Erling Skakke, sonen Magnus Erlingsson, den første krona kongen i Norden, og deira rival kong Sverre. Nils Halleland står for musikk, lydkulisser og produksjon.
Initiativtakarane er tydelege på at dette ikkje er ei lydbok kor ein forteljar les opp ei historie, men eit dramatisert høyrespel med stemmeskodespelar og lydverkemiddel. Lydkulissene er eksempelvis skritt, bølger og musikk som gir inntrykk av stadar eller andre element.
