Statnett planlegg ei ny kraftlinje mellom Sauda og Gismarvik. I Vindafjord spriker dei moglege traseane stort. KART: STATNETT
Vil vekke straumengasjement
Statnett sine planar om ei ny kraftlinje sprikar stort i moglege trasear gjennom Vindafjord. Advokat Ove Kahrs Wangensteen ser fram til å bidra til at folk skal få auga opp for moglege konsekvensar for dei.
— Eg trur ikkje folk er heilt klar over kva som skjer. Her blir Sandeid, Vikedal og Vats veldig rørt. Det bør folk har ein meining om, seier advokat Ove Kahrs Wangensteen i Eurojuris Haugesund.
Advokaten trekker fram eit naturreservat i Stokkadalen i Vats og mykje skog som område som vil få ei linje som skal gå frå Sauda til Gismarvik i Tysvær gjennom seg. Saman med Fokus Sandeid inviterer Eurojuris til eit ope informasjonsmøte på Sandeid samfunnshus tysdag 10. september. Wangensteen får med seg kollega Odd Eirik Osmundsen til å leie møtet.
Formålet er å gjere folk klar over rettane sine, og gangen i ei ekspropriasjonssak frå melding til ein potensiell rettssak i lagmannsretten. Wangensteen seier at dei vil ta for seg kva moglegheiter ein har som grunneigar, kva ein kan forvente av erstatning og presedens frå liknande saker.
