Ein knivsegg mellom tradisjon og innovasjon
Morten Håkonsen er Noregs einaste profesjonelle knivmakar og kombinerer norsk tradisjon med eksotiske materialar. Slik blir kvar nye reiskap også eit kunstverk med ei heilt særeigen historie.
Poff! Det tek berre eit titals sekund frå Morten Håkonsen fyrar opp den eine propansmia til den avlange stålbiten han nett la inn ulmar i eit raudoransje skjer.
1250 grader er heitt sjølv for metall. Med ei lang tong løftar Håkonsen det glødande stålet ut att og plasserer det på ein liten ambolt. Så gyv han smilande laus med ein hammar.
Kanskje ser Håkonsen alt no for seg korleis den ferdige kniven skal bli. Det er ofte slik, at han førestiller seg skaftet og slira medan han jobbar med bladet. Sjølv om kvar kniv startar med ein idé, er det først når han held materialet til dei ulike delane i handa at han veit kva det må bli. Stålet han jobbar med no er forresten vrakrestar frå det tyske slagskipet Tirpitz. Håkonsen vedgår at han er svak for materiale med spesielle historier.
