Varaordførar Gustav Løge Fosse (KrF, f.v.) og ordførar Ole Johan Vierdal (Sp) støtta kommunedirektør Yngve Folven Bergesen sitt forslag om å skyte inn fem millionar kroner i Windafjord Port.
FOTO: BENJAMIN LETH HELGALAND
Kamp om Dommersnes-investering
— Dette er ikkje rett tidspunkt å selje seg ned. No er det kjempeviktig at me er med på å leggje til rette, sa ordførar Ole Johan Vierdal (Sp) i eit formannskapsmøte tydsdag.
Han viste til at Noreg si havvindsatsing er inne i ein viktig fase, med prosjekt som Utsira Nord i sikte. Som ein parallell viste han til industriområde som kommunen har vore med å utvikle, for så å selje seg gradvis ned når næringslivet vil ha areal.
Kommunedirektør Yngve Folven Bergesen foreslo til vedtak at Vindafjord kommune skal skyte inn inntil fem millionar kroner i selskapet Dommersnes AS/Windafjord Port, under føresetnad av at den andre eigaren, Westcon Yards, skyt inn det same. Forslaget fekk støtte med sju mot to stemmer i formannskapet.
Dommersnes AS, marknadsført som Windafjord Port, blei oppretta i 2023 for å utvikle Dommersnes industriområde i Vikebygd, med sikte på serieproduksjon til havvindnæringa.
