Mus øydelegg for enorme summar
Årleg betalar forsikringsselskap ut millionar av kroner etter museangrep i hus, hytter, bilar, bubilar og campingvogner. Med enkle grep kan mykje vera unngått.
Ved Bondekompaniet i Etne går salet av musegift, feller og elektroniske musejagarar unna i stort tempo. Kundane ønskjer å sikra seg mot mus-og rotteskadar på bygningar og køyretøy. I år, med uvanleg mykje mus, har salet auka betydeleg samanlikna med tidlegare år.
— Salet av musegift har auka vesentleg i år. Me har dobla salet av gift til private, og for gift selt på sertifikat har det tredobla seg, seier dagleg leiar i Bondekompaniet i Etne, Jon Oddvin Moe.
Også sal av musefeller, elektriske musejagarar, elektriske feller, børsteband til bygningar og til å leggje rundt køyretøy og gnagarstopp til å tetta mindre opningar mellom anna i køyretøy har auka i raskt tempo dette året.
