Vil lokke ungdommen heim med julekos

— Me håpar sjølvsagt at nokon skal få lyst til å flytte til kommunen vår etter å ha deltatt på denne kvelden, skriv Etne kommune på si nettside.

Arrangementet er i regi av Bu i Sunnhordland. Kommunen ønskjer å freiste ungdommane til å flytte heim, og spør seg kva som kan vere betre enn å arrangere mingel saman med lokale verksemder når ungdomen er heime på ferie.

Det blir ein kveld der studentar, tilreisande og innbyggjarar som allereie bur i kommunen, kan mingle med kvarandre og bli kjende med verksemdene i Etne kommune. Det blir sett opp minibuss tur/retur Etne senter–Skånevik.