Ekstremvêret Jakob
Fryktar slutten for 130 år gamalt kulturbeite
Vegen langs Mosneselva nord for Åkrafjorden blei rasert av ekstremvêret Jakob på seinhausten i fjor. No kan lang sakshandsamingstid for søknadar om naturskadeerstatning hjå Landbruksdirektoratet bety spikaren i kista for ein 130 år lang tradisjon med sommarbeite for hundrevis av sau i Hjortedalen.
Folk som ferdast langs Mosneselva på nordsida inst i Åkrafjorden er ikkje heilt uvande med at ein med nokre tiårs mellomrom har vore nøydde til å flikke på vegen langs Mosneselva. Men det som representantar for grunneigarar, beitelag og nasjonalparkstyret fekk sjå på ei synfaring etter uvêret Jakob i månadsskiftet oktober/november i fjor, var nesten sjokkarta.
(Sjå video av skadane i det øvste vindauget)
For det var ikkje berre småskadar på vegen denne gongen. Store nedbørsmengdene som fall i nedslagsfeltet til vassdraget under uvêret Jakob skapte ein så stor flaum at vegmassane ikkje kunne stå imot. Dei raste ut og forsvann nedover den frådande elva.
