SKJERMBILETE: BKK
Over 1.500 mista straumen
Både Fagne og BKK melder om straumbrot som råkar Grannar-distriktet tysdag ettermiddag. I Etne kommune var over 1.500 kundar råka.
BKK registrerte ein feil i straumnettet som råkar store delar av Etne kommune, inkludert Skånevik, klokka 17.30. Totalt 1.509 kundar er råka. BKK skriv at dei jobbar med feilsøking, og at feilen er venta løyst klokka 20.30.
Ein tipsar i Skånevik fortel at bygda er utan straum, og at ferja heng med magneten på kaien. Tipset fortel vidare at kapteinen på ferja sa over høgtalaren at ferja gir straum til land, og reknar med å kunne gå klokka 18.15. Rundt klokka 18.00 kom kapteinen med ein ny beskjed om at ferja sitt fast, og at Fagne ikkje veit kor omfattande det er.
Også nettselskapet Fagne, som høyrer til Haugaland Kraft, melde om ein straumstans som blei oppdaga klokka 17.27. Då var 3.248 kundar råka. Straumbrotkartet viser at straumbrotet mellom anna råkar Skjold. Feilen var venta løyst klokka 20.30, men forsvann frå kartet før 17.55.
