Elisabeth prøver aktivitetstilboda
Med blåmerker på hendene og støle musklar kastar kommuneoverlegen seg ut i aktivitetar i heile Etne kommune. Målet? Å visa fram alt kommunen har å by på – og å senka terskelen for at fleire skal bli med.
Elisabeth Selland Wintertun har utdanningspermisjon frå kommuneoverlegestillinga si i Etne kommune, men held fram med fastlegestillinga. No er ho godt i gang med folkehelseprosjektet sitt Aktiv i Etne», og stadig på farten mellom ulike aktivitetar i kommunen. Denne veka har ho blant anna vore med på volleyball i Skånevik – noko som har gitt ho store blåmerke på hendene. Ho har òg testa zumba med den spreke zumbagjengen i Etne. Med god tru på eigen rytmesans tenkte ho det skulle gå greitt, men det viste seg å vera meir utfordrande enn ho hadde sett for seg.
Vil bli sterkare
Midt oppi alt trener ho styrke tre gonger i veka hos Havreberg, som ein del av prosjektet, men mest av alt for å styrka seg sjølv for å tåla belastninga framover.
