Vil få fram det gode med Vindafjord

— Det har vore ein veldig kjekk start. Eg har gleda meg i fleire månadar, og det er godt å vera i gang og få treffa kollegaer. No gler eg meg til fortsetjinga, seier Kristine Thorsen Eikeland.

Ho kjem frå stilling som innhaldsprodusent i Amedia, der ho mellom anna har skrive for fleire lokalaviser. Før det har ho jobba for kommunar. Eikeland ser fram til å jobba med kommunikasjon både mellom einingar og ut til innbyggjarane. I rolla som kommunikasjonsrådgivar vil Eikeland få mange ulike oppgåver.

— Eg skal jobba med intern kommunikasjon, nettsida til kommunen, pressemeldingar og generell formidling av det kommunen driv med. Det blir òg besøk hos einingar og arbeid med å visa fram Vindafjord som ein god plass å bu, forklarer den nye rådgivaren.