Oppdaga skjult jettegryte
Med lågare vassføring og nysgjerrigheit fann familien Eikemo noko nytt på ein stad dei kjenner godt. Oppe i fossen fann dei ei stor jettegryte ingen har visst om før no.
I sommar oppdaga Eivind Eikemo og familien ei stor jettegryte då dei ferierte på Eikemo. Heile oppveksten har han reist der om sommaren til onkelen og bestemora og seinare til familiehytta. Far hans vaks opp der, men sjølv er han busett i Porsgrunn med kona Mariann Ellefsen Eikemo og dei to jentene deira Vilde og Mia Ellefsen Eikemo. No har han ført tradisjonen vidare og reiser dit kvar sommar med sin eigen familie.
Fast badeplass
Om somrane har dei alltid bada i ein kulp i elva. Rett ovanfor kulpen har det vore ei ganske stor jettegryte, skjult på grunn av høg vassføring. Men på grunn av det nye vasskraftverket, og omtrent ingen snøsmelting, har vassføringa blitt betrakteleg mindre. Frå nedsida, der dei pleier å bada i ein stor høl, lurte Eivind Eikemo på kva som skjulte seg rett ovanfor. Det pirra nysgjerrigheita.
