Frå krysset ved Aurdalsvegen og rundt 1,5 kilometer i retning Skjold vil det snart koma nye veglys.
Foto: Ann Margit Grønstad
Startar arbeidet på E134: — Det blir lysregulering av trafikken
Arbeidet startar måndag 1. desember på den 1,5 kilometer lange strekninga frå Øvre Vats Bedehus til krysset mot Øygardsvegen. Det skriv Statens Vegvesen på sine nettsider.
I anleggsperioden blir det arbeidstid måndag–fredag kl. 07.00–17.00, og trafikken vil bli lysregulert.
— Det blir lysregulering av trafikken medan vi jobbar. Respekter dette, for alles tryggleik, seier byggeleiar Einar Stange i Statens vegvesen. Han opplyser òg at det blir nedsett fartsgrense i tråd med regelverket, også utanom arbeidstid.
Gang- og sykkelvegen vil i periodar vera delvis fråverande, men det skal vera mogleg å ta seg fram på sidearealet. Entreprenør Jostein Myge AS vil ha erfarne folk på plass som kan hjelpa trafikantar forbi arbeidsområdet.
— Dei vil vera observante og behjelpelege om det er personar som treng hjelp for å koma seg forbi. Spesielt vil dei vera opptekne av skuleborn som passerer, skriv Statens Vegvesen.
Prosjektet skal etter planen vera ferdig innan utgangen av første kvartal 2026, og har ei kostnadsramme på rundt fem millionar kroner.
