Sentralbanksjef Ida Wolden Bache seier styringsrenta truleg skal opp ein gong til før nyttår, men opnar for ein rentepause om prisveksten held fram med å gå ned. oto: Terje Bendiksby / NTB / NPK
Noregs Bank held renta uendra – varslar oppgang i desember
Noregs Bank held styringsrenta uendra no, men gjentek at ho truleg skal opp i desember. Det er likevel nokre teikn som tyder på at vi allereie er på toppen.
Noregs Bank held som venta styringsrenta på 4,25 prosent fram til det siste rentemøtet i år i desember. Sentralbanksjef Ida Wolden Bache understreka likevel at det ikkje er utarbeidd nye prognosar sidan september, då ho fortalde at renta truleg skal opp ein siste gong før rentetoppen er nådd.
– Slik vi no vurderer utsiktene, vil styringsrenta truleg setjast opp i desember. Fram mot møtet i desember vil komiteen få meir informasjon om prisutsiktene. Dersom vi blir sikrare på at den underliggjande prisveksten er på veg ned, kan renta bli halden i ro, seier Bache.
Om det blir nødvendig å heve renta vidare, vil avhenge av den økonomiske utviklinga, understrekar sentralbanksjefen. Sidan renteavgjerda i september har prisveksten falle meir enn venta, og den økonomiske aktiviteten har vore noko lågare enn anslått.
