Ein mindre del av godset som passerer grensa er frakta med norske lastebilar.
Foto: Tor Erik Schrøder / NTB / NPK
Norske lastebilar taper marknadsdelar
Norske lastebilar frakta 29,5 prosent av grensetransporten i 2023 – 1,2 prosentpoeng mindre enn i 2022, melder Statistisk sentralbyrå (SSB).
13,2 millionar tonn med gods var frakta over grensa med lastebil i fjor. 3,9 millionar tonn av dette var frakta med norske lastebilar. Totalt gjekk transportmengda ved import og eksport på lastebil ned med 5,8 prosent frå 2022 til 2023. Same periode var nedgangen på 9,5 prosent for norskregistrerte lastebilar, viser tal frå SSB.
45,7 prosent av godset som var frakta ut av landet i 2023 var frakta av norskregistrerte lastebilar. Det er ein nedgang på 11,1 prosentpoeng sidan 2014, da marknadsdelen var på 56,8 prosent.
Når det gjeld import, var det berre 17 prosent av godset som kom inn i Noreg på veg som vart frakta med norske lastebilar. I 2014 var det 21,9 prosent.
Samstundes viser tala ein auke på svenske lastebilar som frakta gods til og frå Noreg. I 2023 frakta dei 24,6 prosent av godset, noko som er ein auke på 1,2 prosentpoeng frå 2022. Likevel var det ein del høgare før 2018. Svenskregistrerte lastebilar er nest størst på transportar til og frå Noreg.
Andelen lastebilar frå Polen og Baltikum har halde seg relativt stabil. Det ligg på høvesvis 12,6 og 14,1 prosent i 2023.
