Det er framleis usikkert når Bergensbanen kan opne for trafikk etter avsporinga fredag. Bane Nor kjem med ei ny oppdatering på situasjonen skjærtorsdag.
Foto: Statens Havarikommisjonens / Handout / NTB / NPK
Framleis uvisst når Bergensbanen opnar ved Arna
Bergensbanen er framleis stengt mellom Bergen og Vaksdal etter avsporinga fredag. Bane Nor varslar ny oppdatering på situasjonen skjærtorsdag.
Det var fredag kveld at eit godstog med 25 vogner spora av ved Arna stasjon utanfor Bergen. Ingen kom alvorleg til skade som følgje av avsporinga, men lokføraren hadde mindre skadar og vart teken hand om av helsepersonell.
Lokføraren og ein annan togtilsett har fått status som mistenkte i etterforskinga til politiet. Dei er begge avhøyrde i saka.
Laurdag varsla Bane Nor at dei ville komme med ei ny oppdatering på situasjonen måndag ettermiddag, men søndag kveld skriv dei at ei ny oppdatering ikkje vil komme før tidleg torsdag morgon, altså på skjærtorsdag.
Toglinjene som blir påverka, er regiontoget mellom Bergen og Myrdal, og dessutan fjerntoget mellom Bergen og Oslo S.
