No er det fritt fram for import av egg utan å betale toll. I tillegg skal norske eggprodusentar få betre betalt.
Foto: Stian Lysberg Solum / NTB/ NPK
Nortura-konkurrent vil betale bøndene meir for egga
Det er framleis mangel på norske egg i norske daglegvarebutikkar. No tilbyr både Nortura og Den stolte hane meir pengar til eggprodusentane.
Det er stadig mangel på norske egg. Nyleg rykte Nortura ut og varsla at dei vil betale meir for egga til produsentane sine. No varslar konkurrenten Den stolte hane, som er Coops eggleverandør, at dei følgjer etter, skriv Nationen.
– Vi ønskjer også at det skal vere attraktivt å drive med egg, og har vedteke å auke prisen til produsent. Lønnsemda vil framleis vere utfordrande for produsentane, og med innteninga dei har i dag vil det vere vanskeleg å finansiere nye bygg, skriv kommunikasjonssjef i Den stolte hane, Thea Kjendlie, i ein e-post til Nationen.
Kor mykje meir selskapet vil betale eggbøndene for egga, vil dei ikkje ut med.
