Ny rekord for Vipps på 17. mai
På ein 17. mai med strålande vêr vart 2,9 millionar betalingar utførte med Vipps. Det er ny døgnrekord.
– Det er ikkje så rart når ein tenkjer på alle is, brus, kaker, pølser, vaflar og lodd som blir selde på skulegardar rundt om i heile landet. Størst betalingstrykk var det klokka 12.35. Då vart det gjennomført heile 7550 Vipps-betalingar i minutten, seier Vipps-sjef Rune Garborg i ei pressemelding til NTB.
Den gamle døgnrekorden var på godt og vel 200.000 mindre og vart sett på same dag i fjor.
På fylkesnivå vart flest transaksjonar gjennomførte i Akershus, med over 409.000 betalingar. Størst prosentvis vekst i talet på transaksjonar var i Trøndelag, med 19,4 prosent fleire betalingar enn på nasjonaldagen i fjor.
