KrF-leiinga: – Trist å høyre Olaugs framstilling av det som har skjedd

– Vi synest det er trist å høyre Olaugs framstilling av det som har skjedd dei siste månadene. Målet vårt har heile tida vore å finne løysingar og gi Olaug ein god avgang etter at ho bad om det, skriv dei i ei pressemelding.

Pressemeldinga er underteikna fungerande leiar Dag Inge Ulstein, nestleiar Ida Lindtveit Røse, stortingsrepresentant Kjell Ingolf Ropstad og generalsekretær Ingunn Ulfsten. Den vart send kort tid etter at Ulstein og Bollestad opptredde i NRKs Debatten tysdag kveld.

Dei tok også til motmæle mot Bollestads påstand om at varselet mot henne ikkje er behandla på ein ordentleg måte.

– Varselet vart behandla i tråd med KrFs retningslinjer og rutinar, som gjeld same kven det blir varsla mot. Ein partileiar blir behandla på lik linje med andre i partiet. Eit einstemmig sentralstyre tok også saka til orientering, skriv dei.

Vidare legg partileiinga til at det vart klart at bekymringsmeldingane til generalsekretæren skulle behandlast formelt på sentralstyremøtet 6. august.

– I behandlinga vart det klart at det måtte reknast som varsel, skriv dei.

Kvartetten seier også at Bollestad sjølv ønskte å gå av som leiar, og tek sterkt avstand frå skuldingane hennar om maktkamp og forsøk på å presse henne ut.