Meiner sviknott frå utlandet er opphavet til blåtungesmitte i Noreg

NPK: Mattilsynet har sjekka utbreiing av den frykta drøvtyggjarsjukdommen blåtunge i Sør-Noreg. Dei fleste gardane med påvist smitte er i den allereie etablerte tiltakssona. Dei antek difor at det i hovudsak er sviknott frå utlandet som er smittekjelda i norske anlegg.

Mattilsynet har gjennomført prøvetaking for å kartleggje utbreiing av blåtunge i Noreg. Dette vart gjort i slutten av september ved å undersøkje tankmjølkprøver frå anlegg med mjølkeproduksjon i området frå Rogaland til Østfold, som er den delen av landet der det er auka risiko for å vere utsett for blåtungesmitte.

– Når vi tek ut ein tankmjølkprøve, får vi ein samleprøve med mjølk frå alle kyr som leverer mjølk i det aktuelle dyrehaldet. Det gir oss god informasjon om det finst dyr i anlegget som har antistoff mot blåtunge, utan at vi treng å ta prøve av kvart enkelt individ, seier Ole-Herman Tronerud, sjefveterinær i Mattilsynet, i ei pressemelding.

Av dei 675 prøvene som er tekne, viser 54 seg å vere positive for antistoff mot blåtunge. Dette betyr at eitt eller fleire dyr i anlegget på eit eller anna tidspunkt har vore smitta med blåtunge.

Resultata er som venta, med flest anlegg med antistoff mot blåtunge i tiltakssona. Det er berre enkelte anlegg i andre risikoområde, som Rogaland, Telemark, Vestfold og Østfold, som har testa positivt for antistoff mot blåtunge.

– Vi reknar med at det i hovudsak er sviknott frå utlandet som er smittekjelda til norske anlegg, seier Tronerud.

I risikokommunar i Akershus, Buskerud, Telemark, Vestfold og Østfold er over 90 prosent av anlegga med mjølkeproduksjon undersøkte, og i Agder er 82 prosent av anlegga undersøkte. I Rogaland er det teke eit utval på om lag ein tredel, men likevel er Rogaland det fylket med flest undersøkte prøver.

(NPK)