Prisane på burettslagsbustader fall med 2 prosent frå tredje til fjerde kvartal i fjor. I løpet av heile året gjekk dei opp med 5,2 prosent, ifølgje NBBL.
– Bustadprisane fell vanlegvis i fjerde kvartal. Nedgangen var litt mindre enn normalt for kvartalet, skriv Norske Boligbyggelags Landsforbund (NBBL) i ei pressemelding.
Prisen på burettslagsbustader var 5,2 prosent høgare i fjerde kvartal samanlikna med same periode for eitt år sidan.
Ein burettslagsbustad kosta i gjennomsnitt 4,1 millionar kroner i tredje kvartal.
– Framover peikar dei fleste piler mot at bustadprisane skal auke mykje, seier sjeføkonom Hilde Midsem i NBBL.
Ho viser til reallønnsvekst både i fjor og i år, lågare lånerenter i år og lettane i utlånsforskrifta, som betyr at mange kan ta opp meir lån.
– Vi reknar med at bustadprisane aukar med 8 prosent i løpet av 2025 som årsgjennomsnitt. Det inneber ein bustadprisvekst på 9,5 prosent frå desember 2024 til desember 2025, seier Midsem.
(©NPK)