Arbeidarpartiet og Framstegspartiet har håva inn veljarar som har flykta frå Senterpartiet etter at partiet gjekk ut av regjeringa, ifølgje ei ny måling.
Sp har tapt 90.000 veljarar etter at dei forlét regjeringa i starten av februar, ifølgje målinga, som er utført av Respons Analyse på oppdrag frå VG
, Aftenposten
og Bergens Tidende.
Nedgangen er på 2,2 prosentpoeng til 4,6 prosent.
Mange av desse veljarane har gått til Frp, som likevel også fell på målinga. Etter mange målingar med framgang fell Sylvi Listhaugs parti med 2,1 prosentpoeng til 21,5 prosent. Dei er likevel framleis det nest største partiet i landet.
Arbeidarpartiet har opplevd ein stor framgang på målingane etter at Sp forlét regjeringa og Jonas Gahr Støre danna ei rein Ap-regjering. På denne målinga går partiet fram 0,7 prosentpoeng til 27,4 prosent.
Også Erna Solberg og Høgre kan skilte med vekst, med ein oppgang på 1,1 prosentpoeng til 20,2 prosent.
For resten av partia er oppslutninga følgjande: SV: 7,1 (+0,3), Venstre: 5,4 (+0,5), Raudt: 5 (+0,1), KrF: 3,9 (+0,9), Andre: 3 (+0,4), MDG: 1,9 (+0,3). Målingane er baserte på intervju med 1001 personar, som deltok i perioden 5. til 10. mars. Feilmarginen er 2–3 prosentpoeng.
(©NPK)