Viss ein byggjer solkraftanlegg på alle tilgjengelege norske landbruksbygg kan det gi mellom 5 og 7 TWh straum i året, viser ein ny Multiconsult-rapport.
Det svarar til nesten heile det årlege straumforbruket i Oslo, skriv NRK.
Lars Fredrik Stuve, styreleiar i organisasjonen Norges vel som har bestilt rapporten, meiner bønder som produserer solkraft bør kunne selje straum lokalt og sleppe å betale elavgift og nettleige.
Han viser til bustadbyggjelaga som kan dele straum med naboar utan å få desse utgiftene.
– Vi treng same ordning for landbruksbygg, seier Stuve.
Stortinget har som mål å bygge ut 8 TWh innan 2030. Energiminister Terje Aasland (Ap) er positiv til funna i rapporten, og peikar på det årlege landbruksoppgjeret mellom staten og bondeorganisasjonane som staden saka kan diskuterast.
(©NPK)