– Forskinga vår avdekkjer utbreidd førekomst av mikroplast i europeisk jordbruksjord, med konsentrasjonar høge nok til å endra jordeigenskapar og avlingskvalitet, seier Niva-forskar Luca Nizzetto i ei pressemelding.
Niva leier fleire internasjonale forskingsprosjekt om plast i miljøet og fortel at mikroplast er den mest utbreidde menneskeskapte forureininga i europeisk jordbruksjord. Konsentrasjonen kan i nokre tilfelle utgjera opptil 0,1 prosent av jordvekta.
– Plastakkumulering i jord aukar, og utan tiltak vil kritiske tersklar for jorddegradering og matkvalitet bli overskridne, seier Nizzetto.
Forureininga kjem mellom anna frå plast i drivhus, dryppvatning, dekkfilmar, vernande nett, polymer-mikroinnkapslingar for sakte-frigjerande gjødsel, plantevernmiddel og frø dekt av plast.
Plasten i jorda kan bli til plast i menneskekroppen. Ein nyleg studie publisert i Nature Medicine viser at mikroplast finst i den menneskelege hjernen i konsentrasjonar på opptil 0,3 prosent av vekta av hjernen. Dette stammar sannsynlegvis frå opptak gjennom tarmen.
(©NPK)