– SAS har stilt inn fem flygingar frå København, Oslo og Arlanda til tyske flyplassar og 14 flygingar til frå tyske flyplassar til Skandinavia, seier pressevakt Irena Busic i SAS.
Rundt 2000 SAS-passasjerar blir ramma måndag.
Hos Norwegian blir rundt 1000 passasjerar ramma. Alle har fått informasjon frå flyselskapet, opplyser kommunikasjonssjef Charlotte Holmbergh.
– Vi har sett opp ekstra flygingar til Hamburg og Düsseldorf i morgon (tysdag), men til Berlin har vi veldig mange avgangar, så der kan reisande velje å anten få pengane tilbake eller booke om til neste dag, seier ho.
Totalt blir over 3400 flygingar kansellerte på grunn av streiken, noko som rammar 510.000 passasjerar, ifølgje flyplassforeininga Adv.
Tyske Lufthansa varslar om forseinkingar og innstillingar på alle flygingar til dei ramma flyplassane München, Stuttgart, Köln/Bonn, Düsseldorf, Dortmund, Hannover, Bremen, Hamburg, Berlin-Brandenburg og Leipzig-Halle.
Tryggingspersonale, service-medarbeidarar, kontrollørar, passkontrollørar og bagasjearbeidarar er blant dei som er tekne ut i streiken, som skal vare i 24 timar. Det er medlemmer i fagforbundet Verdi som streikar. Dei krev mellom anna auka lønn og fleire fridagar.
(©NPK)