LOs nestleiar Sissel M. Skoghaug lanserte i februar sitt kandidatur som ny LO-leiar. No trekker ho seg både som leiarkandidat og som nestleiar.
Det skriv VG.
I februar sa Skoghaug at ho ønskte å bli LOs nye leiar etter Peggy Hessen Følsvik.
– Etter utspelet har eg fått mykje støtte, men når eg tel opp er det også openbert at mitt kandidatur ikkje vil føre fram. Derfor gav eg i dag beskjed om at eg ikkje stiller til val på kongressen. Til nokon posisjon. Det er ingen dramatikk i dette. Planane var ambisiøse og så gjekk det ikkje, skriv Skoghaug på Facebook.
– No gleder eg meg til LO-kongressen i mai og saman med team Peggy summere opp alt LO har fått til dei siste åra og legge eit skikkeleg godt fundament for den nye leiinga, avsluttar ho.
Skoghaug legg til at ho ikkje kjem til å kommentere saka i media.
Skoghaug er første nestleiar i LO. Ho kom frå LOs største forbund Fagforbundet, der ho var nestleiar.
Fellesforbundetleiar Jørn Eggum er favoritt til å overta som LO-leiar. Den nye leiinga skal veljast på LO-kongressen 5.-9.-mai.
Peggy Hessen Følsvik har vore leiar sidan 2021. Ho varsla i februar at ho ikkje tar attval.