Over 250 varer blir no sette ned i pris hos Vinmonopolet. Prisen er sett ned med opptil 60 prosent.
Kutta varierer frå 10 øre til 760 kroner. Fire vinar blir sette ned meir enn 500 kroner, 18 meir enn 200 kroner, og 98 varer er sette ned med 100 kroner eller meir, skriv DinSide.
Prisane blir sette ned kvar månad, forklarer presseansvarleg Jens Nordahl i Vinmonopolet til NTB. Han understrekar at det er grossistane som styrer prisane, ikkje Vinmonopolet.
Nedprisinga blir gjort av ulike grunnar, til dømes at grossisten ønskjer å tømme lagera sine.
I all hovudsak gjeld dette produkt i det såkalla bestillingsutvalet, som er varer som dei ulike vinmonopola kan bestille inn ut frå etterspurnad.
– Vi ønskjer å treffe kundane lokalt. Butikkane kan tilpasse cirka 20 prosent av sortimentet til den lokale etterspurnaden, seier Nordahl.
Tre gonger i året kan prisane aukast – 1. januar, 1. mai og 1. september. Denne gongen blir det dermed berre nedgang.
(©NPK)