Styrkjer samarbeidet mellom bibliotek og barnehagar

Vestland fylkeskommune fordelar 885.000 kroner til alle kommunane i fylket for å styrkje samarbeidet mellom barnehagar og bibliotek.

Målet er å gi dei yngste betre tilgang på litteratur. Pengane skal vere med på å gi auka leselyst og lesekompetansen blant barn i barnehagealder, og skal fordelast etter folketal. Men dei minste kommunane får eit ekstra løft for å sikre at alle får nytte av ordninga.

– Undersøkingar syner at barn og unge les mindre og dårlegare. Det er ei utvikling vi må prøve å motverke og å snu. Felles leseopplevingar eller høgtlesing er også gode utgangspunkt for felles leik, som igjen fremjar fellesskap og inkludering. Det treng vi i ei tid der barna våre ikkje nødvendigvis ser barne-tv på NRK, men kan velje og vrake mellom veldig mange tilbod, seier Jacob Nødseth (V), leiar i hovudutvalet for kultur, idrett og inkludering i Vestland fylkeskommune.