Ny rapport avslører milliardbehov for investeringar i betre vass- og avløpsnett
Ifølgje berekningar utført av fleire konsulentselskap, må kommunane investere mellom 411 og 535 milliardar kroner i vatn og avløp dei neste 20 åra, skriv Kommunal Rapport.
Dette vil føre til ein stor auke i vass- og avløpsgebyra for hushalda, med ei venta dobling av det gjennomsnittlege årsgebyret.
Annonse
Rapporten vart lagt fram av Norsk Vann – interesseorganisasjonen for norsk vassbransje – torsdag.
– Investeringsbehovet er stort og vil halde fram med å auke. Spørsmålet er korleis vi kan få til dette, både i form av pengar og kompetanse, seier direktør Ragnhild Aalstad i Norsk Vann til Kommunal Rapport.
Ho spør etter ein nasjonal handlingsplan for vatn og avløp for å prioritere og koordinere investeringane.
Investeringsbehovet blir hovudsakleg drive av eit aldrande leidningsnett, auka reinsekrav og auka fokus på forsyningstryggleik. Meir enn halvparten av investeringane er knytt til fornying av leidningsnettet. EUs nye avløpsdirektiv vil krevje store investeringar i avløpsreinsing, spesielt i små og mellomstore kommunar.
Annonse
Investeringsbehovet varierer sterkt mellom regionar og kommunar. Vestland fylke står overfor dei største investeringane, medan Finnmark har det lågaste behovet. Gebyraukane er venta å bli størst i Østfold, Møre og Romsdal og Nordland.
(NPK)
