97 millionar til forsking på mat, miljø, klima og folkehelse

Åtte forskingsprosjekt har fått støtte til å forske på samanhengar mellom mat, miljø, klima og folkehelse. Prosjekta handlar om mellom anna mikroplast, ultraprosessert mat og makt i matsystema.

– Forureining, klimaendringar og tap av naturmangfald er alle alvorlege miljøkriser vi står overfor. Vi treng meir kunnskap om korleis desse krisene heng saman og korleis dei påverkar helsa vår. Denne forskinga vil gi oss viktig innsikt i mikro- og nanoplast, skadelege stoff i plast og PFAS i matsystema – og korleis vi kan redusere forureininga, seier klima- og miljøminister Andreas Bjelland Eriksen, i ei pressemelding.

Blant dei som får midlar er Nofima. Dei får 12 millionar kroner til å forske på samanhengane mellom forbruk av ultraprosessert mat, miljø og folkehelse i Noreg. Forskarane skal undersøkje relevante matvarer, undersøkje eigenskapar, næringskvalitet og miljøpåverknader. Prosjektet involverer aktørar frå heile matsystemet for å fremje samarbeid og praktisk relevans.