Eit halvt århundre i same jobb
I heile 50 år reiste sandeidbuen Magne Økland (75) frå gard til gard for å sjekka mjølkekvalitet og sjå til dyra. Då han runda 70 takka han for seg, men framleis held han kontakt med mange av bøndene og stikk gjerne innom for ein prat og ein kaffiskvett.
— Eg starta som kontrollassistent ved Vikedal Meieri. Det var frivillig for bonden å få kontrollør på besøk og den gong hadde eg 55 gardar. Det var om lag 60 prosent av dei som leverte mjølk, seier Magne Økland og minnest tida som ung kontrollassistent med gardar i Vikedal, Imsland og Sauda på oppdragslista.
Jobben bestod i å levera utstyr som flasker og testar til dei ulike gardane den eine dagen for så å henta dei inn igjen. Og då jobben var unnagjort bar det av garde til meieriet for å analysera prøvane, sjekka fettprosent på mjølka og loggføra resultata.
— Eg hadde 22 besøk på kvar gard kvart år og eg var med på mjølking på kvar gard fire gonger i året. Og eg merka kalvar og førte fjøstavler over kor mykje kua mjølka. I dag har gardane berre eitt besøk i året, seier han.
