STANGE: Barbro Ramstad (21) var ikkje nøgd etter finalen på 800 meter i helgas UM (NM for yngre) i friidrett då ho blei nummer fire. Men i gullspurten søndag heldt ho heilt inn, og vann 1.500 meter på ny pers 5,03. Tidlegare personleg rekord er 5,09.
Flytta til Stavanger
— Det har vore litt av og på med trening. Krevjande studiar, flytting og alt som følgjer med det å etablera seg i ein ny by har sjølvsagt skapt litt startvanskar, men det kunne utan tvil vore både verre og betre. Eg har fått trena brukbart, men ikkje alt har gått heilt etter programmet. Slikt kan vi heller ikkje rekne med, understrekar Barbro Ramstad.
Vintersesongens store mål for Etne-jenta var helgas innandørs NM. Resultatmålsetninga var minst ei medalje, og gullmedalja var ekstra kjekk å få med.
— Eg kjem neppe til å delta i senior NM her på Stange. Derfor blir dette vinterens høgast prioriterte stemne, fortel ho.
Vil til NM
Barbro Ramstad har aldri klart å kvalifisera seg for hovud NM utandørs.
— Det er sesongens store mål. Eg føler at vintersesongen har vore brukbar, så her er eg i rute, seier ho.
Førre helg persa Barbro seg på 800 meter frå 2.34 til 2.29,87 i Stavanger. I helga gjorde ho 2.33. På 1500 meter hadde ho 5.09 som personleg rekord før helga.
— Det er ikkje mogleg å samanlikne tider inne og ute. Svingane er heilt annleis, og bana er berre 200 meter, fortel ho.
Utandørs har Barbro ikkje medalje frå junior NM. Men ho hadde sølv og bronse på 1500 inne frå før. Ho har og vore på sigerspallen under NM i terrengløp for junior.