Dei valde å slå seg ned i Vikebygd, og overtok garden til Jan Otto sine foreldre. Men det var ikkje bønder dei kom for å bli – det var coaching som låg hjarta deira nærast. For tre og eit halvt år sidan, spurte dei fleste: Coaching….kva er det?? Men det var for tre og eit halvt år sidan…..
Det er eit varmt ektepar som møter meg i døra, på kurssenteret sitt i Vikebygd. Det er kursdag – og eg har fått lovnad på eit intervju i lunsjpausen deira. Eg kjem inn i ei lita stove, med ved-varme og rykande varm kaffi på bordet, og ekteparet Hovda tek vennleg imot meg – med både ord, blikk og sjel. Tanken på at eg «forstyrra dei» i lunsjpausen, bles bort med vinden. Her er eg i alle fall hjarteleg velkommen!
Det som byrja som ei lita bedrift, har no vakse seg til å vera ei stødig og solid bedrift som dei fleste rundt i distriktet har høyrt om. Mange har også fått gleda av å delta på eit eller fleire av kursa dei har å by på. I dag heiter bedrifta Ålreit coaching og kompetanse senter – noko ekteparet har lyst til å få fram. Det som er nytt no, er at dei som kjem til Ålreit Coaching og kompetansesenter, kan få ei utdanning innan dette feltet, dersom dei ynskjer det. Det er ikkje lenger berre hjelp til sjølvhjelp. Det er også hjelp til å utdanne seg til å hjelpe andre.
Ålreit for alle
Ekteparet Hovda fortel at coaching er for alle. Målet med coaching er enkelt og greitt: Betre framtid. Derimot er det svært ulike måtar å komme til målet på. Coaching er læring og utvikling. Mange av dei som kjem til senteret er enkeltpersonar eller ektefellar. Ålreit sin visjon er at dei i saman med kursdeltakarane kan frigjere potensial slik at ein kan verkeleggjera draumar og mål. Ein kan skape det liv ein ynskjer, men dei meiner at ditt liv også er ditt ansvar. Å leve utan klare mål er som å køyre rundt i tjukk tåke. Ofte manglar drivkrafta, og resultatet vert ofte annleis enn ein hadde tenkt på førehand. Med coaching vil dei hjelpe menneske til å bevege seg målretta i rett retning. Dei siterar også Galileo Galilei – som seier: «Du kan ikkje lære menneske noko, du kan berre hjelpe dei til å finna det i seg sjølv»
Mange bedrifter kjem også til senteret for å delta. Ekteparet kan vise til ei undersøking som seier at vanlege kurs som blir arrangerte av arbeidsgjevar eller andre, svært ofte ikkje har stor verknad. Det handlar ikkje om at kursa ikkje er gode. Dei handlar rett og slett om at prosessen med å bringe det vidare inn i arbeidslivet og utføre det i praksis ikkje er enkelt å få til. Her møter ein forskjellen hos Ålreit. Senteret fylgjer som oftast med inn i kvardagen også – der ein etter ei tid evaluerar i saman. Dette har dei fått gode tilbakemeldingar på. Det viktigaste med eit kurs, er først og fremst motivasjon. Dei viser også til eit anna ordtak – som talar deira sak svært godt: «Om du skal bygge eit skip, skal du ikkje tromma saman mange menn for å skaffe treverket og fordele arbeidet. Gi dei i staden lengsel etter det vide uendelege havet».
Senteret kan tilby individuell coaching av personar som vil oppnå eigne og bedrifta sine mål. Dei har også teamutvikling for å fremma effektivt samarbeid med glede, lyst og engasjement. Og dei kan by på foredrag, kurs og seminar med fleire tema som, sjølvleiing, profesjonell kommunikasjon, stressmestring, konflikthåndtering og motivasjon.
Framtidsplanar
Ålreit er ei bedrift i kraftig vekst. Dei har i dag fleire tilsette, og dei har opna kontor både i Bergen og Haugesund – med hovudkontor i Vikebygd. Fleire av kursdeltakarane som har valt å utdanne seg hos Ålreit, er snart ferdige med utdanninga si, og kjem til å tre inn i bedrifta. Jan Otto seier at dette vil kunne gje Ålreit eit enda grundigare fotfeste og eit enda betre tilbod til framtidige besøkjande ved senteret. Han seier at dei har kvar sine område dei er særs flinke på – og kan i større grad nytte seg av kvarandre sine kvalifikasjonar.
Det er ikkje berre utviding, med fleire kontor rundt om kring i distriktet som er planlagde. Ekteparet har også store planar for eigedommen i Vikebygd. Dei er i samtalar med arkitekt om riving av ei gammal løe, der ein kjem til å bygge eit kurssenter. Desse framtidsplanane ligg i ganske nær framtid.
Det er eit svært engasjert ektepar eg får sitje å høyre på, og eg trur ikkje eg tek meg vatn over hovudet når eg seier dei har funne sitt livs kall. Det er eit solid og grundig grunnlag dei har lagt ned i Vikebygd, og ein kan sjå at dette er noko dei brenn for.
På nettsida deira finn eg eit ordtak av Henry Ford: «Du kan tru at du kan – og du kan tru at du ikkje kan, og i begge tilfeller kan du ha rett!!» Det som slår meg då, er at Jutta og Jan Otto verkeleg har tru på at dei kan!! – og dei klarar…