NæringsGIV 2019 går av stabelen 23. mai, og alt nå er det klart for to svært kjende namn blant dei mange gjestene. Oslo-kvinna Karina Hollekim har dei siste vekene vore aktuell i NRK1-serien Mesternes Mester som blei spela inn på Mallorca.
Gjennom det populære tv-programmet på fredagskveldane har mange nordmenn blitt godt kjent med 42-åringen sin dramatiske, tøffe og suksessfulle historie. I åra 1999 – 2004 tok ho ei rekkje topplasseringar i diverse fristilrenn på ski. Likevel er Hollekim mest kjent som pioner for basehopp.
Ho er framleis den einaste norske kvinna som har drive med basehopp profesjonelt. I 2006 krasja Hollekim i eit hopp i Sveits i 100 km/t. Av legane blei ho spådd eit liv i rullestol, men etter 20 operasjonar kom ho seg på beina igjen og er nå i sin beste form sidan ulykka skjedde.
Raud tråd
Asbjørn Moe er svært glad for å ha dei to profilane på plass.
— Sjølv om programmet framleis er under arbeid, høver duoen godt ettersom årets raude tråd handlar om å gå på trynet, og reisa seg igjen, seier leiaren i Fiske Næringsforening som arrangerer Olalia-treffet i samarbeid med Medvind24 og Grannar.
NæringsGIV som er lagt til Olalia Fjellstove, er blitt eit populært arrangement for det lokale næringslivet. Her skal næringslivet heidrast med fleire prisar, kombinert med fleire føredrag. Tidlegare har kjente personar som Aslak Sira Myhre, Elin Ørjasæter og Ingebrigt Steen Jensen, sytt for å trekkja fullt hus i Haugesund turistforening si populære hytte i Vindafjord.
— Me vil ha bedrifter og bedriftsleiarar som deler sine erfaringar om at det ofte trengs fleire forsøk før ein lukkast, og at det kan vera tøffe slag og djupe nedturar før ein når dit, seier Asbjørn Moe som gler seg til å høyra Karina Hollekim fortelja om sin nedtur og lange veg tilbake.
Serieskapar
Teikneserie-skaparen Børge Lund (45) står mellom anna bak den populære teikneserien Lunch.
Han er fødd på Stokmarknes i Nordland, vaks opp i Sauda og er no busett i Stavanger.
Grannar kom først i skade for å skriva at det var handballprofilen Børge Lund som skulle til NæringsGiv. Det var feil og det beklagar vi.