— Eg samlar på mange ulike typar planter og eg har over 50 ulike typer rhododendron. Nå har meldt meg inn i rhododendronklubben, seier Ingrid Marie Dale og viser rundt i den vakre hagen heime i Nedre Vats der dei fargerike vekstane står i full flor.

Og som om ikkje fleire ti-tals rhododendronplanter var nok så har ho sikra seg ytterlegare fleire sorter til samlinga si. Dei inngår i eit prosjekt i regi av rhododendronklubben der målet er å finna ut kor dei ulike sortane trivst best.

— Nå har eg fått nye rhododendron-planter for å testa ut korleis dei klarar seg og korleis dei veks. Eg skal registrera fakta, seier ho.

Magnolia

I tillegg til rhododendron testar ho ut ulike typar magnolia, også dette i regi av rhododendronklubben. Den velduftande vårblomstrande busken har alt fått godt fotfeste i den frodige hagen, og med sju ulike sorter er ho på god veg til å få seg ein flott samling.

Den hageglade dama veit å ta vare på alt som veks, enten det er ein vakker magnoliabusk eller ein liten sommarblom, og då ny terrasse skulle byggjast der ein magnolia hadde slått rot fann ho ei løysing som var til glede både for planta og eigaren.

— Me skar hol i terrassen for å få plass til magnoliaen, seier den tidlegare leiaren i Vindafjord hagelag.

Helsebot

Ingrid Marie Dale kosar seg med hagearbeidet og kan ikkje tenkja seg ein betre hobby. Det er ikkje få timar den aktive dama spanderer i hagen sin, og for kvart spatak ho tek eller kvart lass med grus ho trillar ut haustar ho både glede og helsebot som løn for strevet.

— Eg jobbar i hagen kvar dag når eg er heime. Hagearbeidet er mi helseforsikring, seier ho.

Til saman har ho rundt fem mål med ferdig opparbeidd hage å ta seg av, og når ho ikkje jaktar ugras, gjødslar eller planlegg nye hageprosjekt tek ho seg ein tur inn i drivhuset. Her dyrkar ho fram grønsaker, sommarblomar og andre vekstar som skal få seg ein plass i sola når sommaren bankar på døra for fullt.

— Eg sår alt i drivhuset, seier Dale.

Fantasifulle hageidear

Ingrid Marie har alltid eitt hageprosjekt eller to på gang, og det skortar ikkje på arbeidsvilje når ho går i gang med nye oppgåver. Etter mange år med planlegging og hardt arbeid kan ho i dag gleda seg over ein uvanleg flott og blomstrande hage med eit svært personleg preg. Hagerommet er inndelt i ulike soner. Ein stor dam med vassliljer har fått plass like ved inngangen til huset, og frå den vesle bekken like ved kan ein høyra lyden av sildrande vatn. I den romantiske hagen står blomane på rekkje og rad, og i den gamle jernsenga, som har fått heidersplass i hagen, har rosebuskane fått ei næringsrik seng å liggja på.

Pil kan brukast til mykje og i hagen til Dale finn ein både gjerde, portalar og ei lita lun hytte laga av den velvillige planta i vierfamilien. Ein eigen avdeling for grønsaker og eit hønsehus har det også blitt plass til, og på eit lite platå med god utsikt over hagen og vatnet nedanfor har Dale og mannen  Roar Breivik bygd ei flott utestove med badestamp og stor platting.

Fargerike fuglekassar gjev husly for flygande gjester og for å vera sikker på at ein ikkje går seg vill når ein ruslar rundt i hagen er små skilt sett opp for å visa veg. Føler ein seg litt pjusk ein dag kan ein rusla seg ein tur langs bedringens veg og har ei ekstra god tid kan leggja turen til omvegen. Og i slutten av hagen viser eit skilt at ein er ved vegs ende.

Stell

Både buskar og blomar krev stell for å veksa seg sunne og friske. Når nye planter skal i jorda får dei seg ein skikkeleg dose kukompost rundt røtene, og når dei har slått skikkeleg rot får dei påfyll av næring.

— Alt nytt blir planta i kukompost og seinare hiv eg på heilgjødsel og kompost, seier ho.

Med ein fleire mål stor hage skulle ein tru at det var rikeleg å halda styr på, men for den hageglade dama i Koltveitvegen er det framleis fleire prosjekt som står på ønskjelista. Og kanskje kan det gje plass til enda fleire rhododendronplanter og magnoliabuskar.

— Eg har planar om å utvida litt til, seier Dale og smiler lurt.