Det var berre lette og dansegleda å spora hjå ølenskvinna etter vel utført engelsk vals framføre mange hundretusen tv-sjåarar. Med elegante svingar og nett fotarbeid, var dommarane nøgde etter Tvedts første TV2-dans saman med dansepartner Egor Filipenko. Og TV-sjåarane var samde, og sende henne vidare med ein solid del av sms-stemmene. Men det var ikkje resultata Tvedt tenkte mest på etter siste takter på dansegolvet.
— Eg har aldri dansa i mitt liv, og før eg tok til var eg vettskremt, nesten apatisk. Etterpå var eg berre kjempeglad for at eg hadde klart det, og enormt letta for at eg nå hadde fått prøvd meg og kjent på korleis det var, seier Tvedt til Grannar.
Den nye superdansaren frå Ølen sikra seg 26 poeng frå dommarane for dansen, som ikkje var av dei enklaste.
— Dansinga er vanskeleg for alle, men det ligg ikkje naturleg for meg, og sjølv om det ikkje var fysisk tøft, var det beinhardt sidan det var så vanskeleg, fortel Tvedt, som framleis er i storstemning etter laurdagsvalsen.
Og på søndag var det på han igjen, med stadig høgare krav til takt, teknikk, fysisk form og latinske bevegelsar.
— På laurdag skal me dansa latinsk dans, så då får eg verkeleg prøva formen, seier Tvedt, som nå går inn i ei veke med gjennomsnittleg fire dansetimar dagleg før den store styrkeprøven laurdag kveld. Og ho set framleis si lit til både eigne dansekunstar og ikkje minst til stemmer heimefrå.
— Eg veit ikkje om folk er klar over kor mykje dei stemmene betyr for oss, men eg håpar og ber om mange stemmer heime frå for å koma vidare, seier Tvedt.