Laurdags morgon vakna fleire til keisame realitetar. Rapportar om både små og større øydeleggingar, tikka inn etterkvart som laurdagsnatta vart til dag. Stormen som stod på som verst fredag og laurdag, laga bry for mange. Rundt i heile distriktet er det rapportert om rotvelta tre, og takpanner og heile tak som var borte. Det var rett og slett ikkje trygt å gå ute dette døgeret.
Campingplassar hardt råka
Både ved Etne Camping og Kyrping Camping vart det mykje øydeleggingar. Fleire campingvogner velta over ende. Fortelt og iso-campar vart flerra bort med vinden. Ved Kyrping Camping kunne Steinar Skjervheim frå Sandnes fortelje om ei hektisk natt. Både han og andre jobba heile natta med å sikre campingplassen.
— Det bles så gale at det var rett og slett vanvidd å gå ute, fortel Steinar Skjervheim.
Dei jobba mest med å demontere iso-campar og fortelt, og ein gong måtte dei hoppe over eit gjerde, for ikkje å få ein flygande iso-camp midt i hovudet. Sekunder etter vart den smadra til pinneved. Ein båt vart også teken av vind og bølgjer.
Ved Etne camping velta ei campingvogn og fleire fortelt og iso-campar vart også tekne her. Tor Koloen og Nils Helland reiste frå Fitjar for å sikre Koloen si campingvogn. Likevel rakk dei ikkje fram i tide. Taket på iso-campen hans, var som fleire andre sine også flerra av.
— Her må ein berre redde det som reddast kan, seier Koloen.
Bru bles bort
Ved Frette, vart ei bru totalskadd av den sterke vinden. Tre hus vart med dette isolert. Det er ikkje tvil om at har vore sterke krefter i sving –søndag morgon låg heile brua vrengt nedi elva. Tidleg laurdag morgon gjekk det eit nytt ras ved Tungesvik i Skånevik. Ein askestubbe velta ned i vegen og tok med seg noko stein ut i vegbanen. Statens Vegvesen fekk melding om raset klokka 06. 50, og klokka 07. 32 var vegen open att for fri ferdsel.
Arne Jørgensen hadde vakt for Mesta, og fortel om ein travel laurdag.
— Forutan raset ved Tungesvik, datt det også ned ei steinblokk aust for Øvstebøhammaren i Etne. Steinen landa i like innanfor den kvite stripa, og trafikken gjekk som vanleg. Ved Tørresdal ut mot Sagi, var det svært mykje trefall. Trea bøygde seg over vegen. Ei stund var det nesten som å kjøra gjennom ein tunnel. Vegen der var stengt eit par timar, før me fekk rydda vekk det aller verste. Me byrjar på sluttoppryddinga måndag morgon, seier Arne Jørgensen i Mesta.