GrannKam slepp kvalifisering

Grunnen til at krinsen har diskvalifisert Klepp 2 er at laget ikkje har møtt til kamp to gongar denne sesongen. Dermed er det Kolnes, som låg sist på tabellen, som får spela kvalifisering og ikkje GrannKam.
Få mann
GrannKam-trenar Frank Abelseth fekk beskjeden seint tysdag kveld.
— Me likar å spela fotballkampar, og var innstilte på å spela kvalifiseringa også. Før sesongen sa eg at målsetjinga var å unngå nedrykk, så slik sett er det greitt å sleppa kvalifiseringa, seier Abelseth. På treninga tysdag hadde han ei oppteljing av aktuelle spelarar til ein eventuell kamp no til helga.
— Den viste at me ville hatt problem med å stabla elleve mann på beina denne helga. Til heimekampen ville me hatt eit ok lag. Men det illustrerer godt korleis sesongen har vore, og det står stor respekt av dei spelarane som har stått på. Det er frustrerande også å vera spelar når ein slit med å stille lag, seier Abelseth.
Han ønskjer no at klubbane bak GrannKam tenkjer nytt for å sikra framtida for klubben.
Ein klubb
— Utfordringa for GrannKam blir like stor neste år. Skal ein klara å skapa entusiasme rundt klubben må det vera ein klubb alt frå dei yngste laga. Det må vera den same klubben, den same drakta og dei same folka heilt ut. Etne har det lettare der, seier Frank Abelseth og understrekar at dette er hans eigne tankar og ikkje klubben sine.
Sjølv er han på begge sider i dag, som trenar for A-laget til GrannKam og lilleguttlaget til Vindafjord.
— For dei eg trenar i Vindafjord blir GrannKam nokon andre. Dermed får ein ikkje entusiasmen frå grasrota, seier han.
— Dette problemet er ikkje vanskeleg å løysa teknisk. Kjenslene ved å skapa ein felles klubb frå dei aller yngste til A-lag er det vanskelege, seier Abelseth.