Det er fleire ukrainske kvinner som engasjerer seg innan manikyr og pedikyr i fleire av bygdene i Vindafjord. Nokre på hobbybasis, andre for å vurdera marknaden og nokre er tilsette i skjønnheitssalongar eller hjå frisørar i Tysvær og Vindafjord.
Alla Palamarchuk understrekar at ho er registrert som næringsdrivande, og viser fram norsk attestasjon for føretaket Luna Negler. På veggen i salongen heng fem diplomar som viser at ho kan faget sitt, og er godkjent negle- og fotpleiar frå heimlandet.
— Det kan eg underskriva på at ho kan, seier Torhild Ramsnes som nett er ferdig med ei behandling.
Ramsnes seier at ho trivst godt i salongen og at det er koseleg å få behandling og ein god prat. I salongen heime i huset til familien Palamarchuk er Ramsnes raskt blitt kjent med heile familien som er hennar nye sambygdingar.
Døme på pedikyr utført av Alla Palamarchuk. FOTO: Privat
Respektert fag
Alla Palamarchuk seier seg litt overraska over at det er så mykje lågare fokus på manikyr og pedikyr som fag her i landet. Dessuten at mange trur det berre handler om negler.
— I Ukraina er det ei sjølvfølgje for mange kvinner å bruka ein god del tid og pengar på å stella hender og føter, seier ho.
Ho understrekar at bransjen arbeider med hygiene og tryggleik i fokus, og at manikyr og pedikyr ikkje berre er skjønnheit, men òg førebygging av plager. Dessutan meiner ho at det kan bidra til meir komfort og betre sjølvkjensle.
Sjølv har ho investert i utstyr for behandling av hender, samt apparatur for fotbehandling og det ho kallar medisinsk fotpleie.
— Bransjen har høg standard når det gjeld å jobba med kvalitetsprodukt og sterile verktøy, seier ho.
Ho har bilete av stelte hender og føter ho har behandla i salongen sin. I tillegg til fint farga negler, kan ho laga små kunstnariske motiv på neglene.
Døme på manikyr gjort av Alla Palamarchuk kor eit par av neglene har fått motiv. FOTO: Privat
Storbyfolk
Familien på sju frå Kiev kom først til Engerdal i Trysil, og det så seint som i 2023. Så blei det Vindafjord, kor dei etter kvart kjøpte eige hus i Sandeid. Ektemannen Oleksandr fekk seg fast stilling som elektrikar i Helgevold Elektro AS.
Dei fem barna er i alderen to til atten år, og kontrasten mellom vesle Sandeid og hovudstaden Kiev med nærare tre millionar innbyggjarar, er noko dei sjølvsagt merkar.
— Her er det trygt, og me får jobba og dermed tena våre eigne pengar, seier Alla.
Dei to eldste barna har sommarjobbar, og trass i få år i landet snakkar dei godt norsk.
— Eg har arbeid i Ølensvåg i sommar, og så skal eg byrja på utdanning som kokk på Karmsund Vidaregåande skule i Haugesund, seier Anton Palamarchuk, som nett er blitt 18 år og har eigen bil for å koma seg på jobb og skule.
Han seier at det sjølvsagt er ein overgang å flytta får ein millionby, til vesle Sandeid.
Frå Kiev til Sandeid, syskenparet Barbara og Anton Palamarchuk FOTO: Nils Tokheim
Utvidar
Allereie få månader etter opninga vurderer Alla Palamarchuk å bruka eit større lokale i det rommelege huset i Saudavegen tett på sentrum av Sandeid. Det blir i tilfelle i grunnetasjen som gjer salongen meir synleg, samt at det skil familielivet betre frå arbeidet.
Ho fortel at for hennar del er Sandeid hovudmarknaden, men at ho er glad kvar gong det kjem klientar frå andre stader. Ho har bil og kan koma på heimebesøk til dømes hjå eldre folk.
— Eg har talt dagar kor mor mi har hatt nærare ti klientar til behandling, seier sonen Anton.
Mora seier rett nok at ho er glad for at ho i tillegg har ein jobb som tilkallingsvikar på sjukeheim.
Å jobbe heimefrå er praktisk spesielt om sommaren for fembarnsmora Alla Palamarchuk når skular og barnehagar er sommarstengde. Her er det sonen Hrisha (16) som skal ut på sykkeltur med tvillingane Stephania og Solomia. på to år og fire månader. FOTO: Nils Tokheim
Her får Torhild Ramsnes behandling av Alla Palamarchuk. FOTO: NILS TOKHEIM